തിരുവനന്തപുരം: സംസ്ഥാനത്ത് ഇന്നും വേനൽമഴയ്ക്ക് സാധ്യത. പത്തനംതിട്ട, ഇടുക്കി ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. ഈ ജില്ലകളിൽ ഒറ്റപ്പെട്ടയിടങ്ങളിൽ ശക്തമായ മഴയ്ക്കാണ് സാധ്യത.
കണ്ണൂർ, കാസർഗോഡ് ഒഴികെയുള്ള ജില്ലകളിൽ മഴയ്ക്ക് സാധ്യതയുണ്ട്. കിഴക്കൻ മേഖലകളിൽ കൂടുതൽ മഴയ്ക്ക് സാധ്യതയുണ്ട്. ഇടിമിന്നലിനും സാധ്യതയുണ്ട്. മഴ ലഭിക്കുന്നതോടെ ഈ ദിവസങ്ങളിൽ താപനിലയിൽ നേരിയ കുറവുണ്ടാകാം. ഓട്ടോമാറ്റിക് വെതർ സ്റ്റേഷൻ കണക്കുകൾ പ്രകാരം സംസ്ഥാനത്ത് ഇന്നലെ ഏറ്റവും ഉയർന്ന താപനില രേഖപ്പെടുത്തിയത് പാലക്കാട് ജില്ലയിലെ എരിമയൂരിലാണ് (41.2 ഡിഗ്രി സെൽഷ്യസ്). തിരുവനന്തപുരത്തും ഇന്നലെ ചൂട് 40 ഡിഗ്രി സെൽഷ്യസ് കടന്നിരുന്നു.
തൃശൂർ മറ്റത്തൂർ വെള്ളിക്കുളങ്ങര മേഖലയിൽ ഇന്നലെ വൈകിട്ടുണ്ടായ കനത്ത മഴയിലും മിന്നൽ ചുഴലിയിലും വ്യാപക കൃഷിനാശമുണ്ടായി. പ്രദേശത്തെ ആയിരത്തിലധികം വാഴകൾ കാറ്റിൽ നശിച്ചു. നിരവധി തെങ്ങുകളും കടപുഴകി വീണു. പ്രദേശത്തെ സെന്‍റ് സെബാസ്റ്റ്യൻസ് പള്ളിയുടെ മേൽക്കൂരയ്ക്കും സമീപത്തെ രണ്ട് വീടുകൾക്കും കാറ്റിൽ കേടുപാടുണ്ടായി. വൈദ്യുതി കണക്ഷനും താറുമാറായി. എറണാകുളം അങ്കമാലിയിലും ശക്തമായ കാറ്റും മഴയുമുണ്ടായി. പലയിടത്തും വാഴക്കൃഷി നശിച്ചു.
