മോട്ടോര് വാഹന വകുപ്പിന്റെ എഐ ക്യാമറകള് ഇന്ന് മുതല് പ്രവര്ത്തനം ആരംഭിക്കുകയാണ്. ഗതാഗത നിയമങ്ങള് കൃത്യമായി പാലിച്ചില്ലെങ്കില് എഐ ക്യാമറകണ്ണുകളില് കുടുങ്ങും. ഒരു ദിവസം ഒന്നിലധികം തവണ നിയമം ലംഘിച്ചാല് അത്രയധികം തവണ പിഴയടക്കേണ്ടി വരും.
സംസ്ഥാന നിരത്തിലോടുന്ന എല്ലാ വാഹനങ്ങളേയും മോട്ടോര് വാഹന വകുപ്പിന്റെ നിരീക്ഷണത്തിലാക്കുകയെന്നതാണ് പദ്ധതിയുടെ ലക്ഷ്യം. 726 അത്യാധുനിക നിരീക്ഷണ ക്യാമറകളാണ് ഇതിനായി സ്ഥാപിച്ചിട്ടുള്ളത്.
ഗതാഗത നിയമം ലംഘിച്ചുണ്ടാകുന്ന അപകടങ്ങള് ഒഴിവാക്കുന്നതിനു വേണ്ടിയാണ് നിയമം കര്ശനമാക്കുന്നത്. ഹെല്മെറ്റ്, സീറ്റ് ബെല്റ്റ്, അപകടം ഉണ്ടാക്കി നിര്ത്താതെ പോകല് എന്നിവ പിടിക്കാന് 675 ക്യാമറകളും സിഗ്നല് ലംഘിച്ച് പോയി കഴിഞ്ഞാല് പിടികൂടാന് 18 ക്യാമറകളുമാണ് ഉള്ളത്.
നിയമലംഘനം നടന്ന് ആറ് മണിക്കുറിനുള്ളില് വാഹന ഉടമയ്ക്ക് സന്ദേശം ലഭിക്കും. പിന്നീട് ഉടമയുടെ അഡ്രസില് രജിസ്റ്റേർഡ് കത്ത് വരും. പിഴ അടച്ചില്ലെങ്കില് ടാക്സ് അടക്കുമ്പോഴും വാഹനം കൈമാറ്റും ചെയ്യുമ്പോഴും പിഴത്തുക അടയ്ക്കേണ്ടി വരും.
അനധികൃത പാര്ക്കിങ് കണ്ടെത്താന് 25 ക്യാമറകളും അതിവേഗം കണ്ടെത്താന് നാലു ക്യാമറകള് പ്രത്യേകം ഉണ്ട്. വാഹനങ്ങളുടെ രൂപമാറ്റം, അമിത ശബ്ദം എന്നിവ കൂടി ക്യാമറകള് കണ്ടെത്തും.
ഹെല്മെറ്റും സീറ്റ് ബെല്റ്റും ഇല്ലെങ്കില് 500 രൂപയാണ് പിഴ. അമിതവേഗത്തിന് 1500 രൂപ, മൊബൈല് ഫോണ് ഉപയോഗിച്ച് ഡ്രൈവിങ് ചെയ്താല് 2000 രൂപ, അനധികൃതപാര്ക്കിങിന് 250 രൂപ, പിന്സീറ്റില് ഹെല്മെറ്റ് ഇല്ലെങ്കില് 500 രൂപ, മൂന്ന് പേരുടെ ബൈക്ക് യാത്ര 1000 രൂപയാണ് പിഴ
പ്രതികരിക്കാൻ ഇവിടെ എഴുതുക