ഡല്ഹി: ചാരവൃത്തിക്കേസില് വധശിക്ഷ റദ്ദാക്കപ്പെട്ട മുന് ഇന്ത്യന് നാവികസേനാംഗങ്ങള്ക്ക് മൂന്നുമുതല് 25 വര്ഷം വരെ തടവുശിക്ഷ വിധിച്ച് ഖത്തര് കോടതി. കേസില് കുറ്റാരോപിതരായ എട്ടുപേരില് ഒരാള്ക്ക് 25 വര്ഷവും നാലു പേര്ക്ക് 15 വര്ഷവും രണ്ടുപേര്ക്ക് 10 വര്ഷവും ഒരാള്ക്ക് മൂന്നു വര്ഷം വീതവുമാണ് തടവ് വിധിച്ചിരിക്കുന്നത്.
2022 ഓഗസ്റ്റിലാണ് ചാരവൃത്തി ആരോപിച്ച് മലയാളി ഉള്പ്പടെ എട്ട് ഇന്ത്യന് നാവികരെ ഖത്തര് അറസ്റ്റ് ചെയ്യുന്നത്. ഇന്ത്യന് നാവികസേന മുന് ഉദ്യോഗസ്ഥരായിരുന്ന ക്യാപ്റ്റന് നവതേജ് സിങ് ഗില്, ക്യാപ്റ്റന് ബീരേന്ദ്ര കുമാര് വര്മ, ക്യാപ്റ്റന് സൗരഭ് വസിഷ്ഠ്, കമാന്ഡര് അമിത് നാഗ്പാല്, കമാന്ഡര്മാരായ പൂര്ണേന്ദു തിവാരി, സുഗുണാകര് പകല, കമാന്ഡര് സഞ്ജീവ് ഗുപ്ത, സെയ്ലര് മലയാളിയായ രാഗേഷ് ഗോപകുമാര് എന്നിവരാണ് പിടിയിലായത്.
മൂന്നുവര്ഷം തടവു ലഭിച്ചിരിക്കുന്നത് തിരുവനന്തപുരം സ്വദേശിയെന്ന് കരുതുന്ന സെയിലര് രാഗേഷ് ഗോപകുമാറിനും 25 വര്ഷം തടവ് അല് ദഹ്റയുടെ മാനേജിങ് ഡയറക്ടറായിരുന്ന കമാന്ഡര് പൂര്ണേന്ദു തിവാരിക്കുമാണെന്നാണ് റിപ്പോര്ട്ട്. എന്നാല് ഇതുസംബന്ധിച്ച് വിദേശകാര്യ മന്ത്രാലയം ഇതുവരെ പ്രതികരിച്ചിട്ടില്ല.
ഇറ്റലിയില് നിന്ന് അത്യാധുനിക അന്തര്വാഹിനികള് വാങ്ങാനുള്ള ഖത്തറിന്റെ രഹസ്യ നീക്കങ്ങളുടെ വിവരങ്ങള് ഇസ്രയേലിന് ചോര്ത്തി നല്കിയെന്നതാണ് നല്കിയെന്നാണ് ഇവര്ക്കെതിരേയുള്ള ആരോപണം. ഇവരുടെ ജാമ്യാപേക്ഷ പലതവണ തള്ളുകയും, ഖത്തറിലെ പ്രാഥമിക കോടതി കഴിഞ്ഞ മാസം വധശിക്ഷ പ്രഖ്യാപിക്കുകയും ചെയ്തിരുന്നു. തുടര്ന്ന് കേന്ദ്ര വിദേശകാര്യ മന്ത്രാലയം നടത്തിയ ഇടപെടലിനൊടുവിലാണ് വധശിക്ഷ റദ്ദാക്കിക്കൊണ്ട് ഉത്തരവ് വന്നത്.
പ്രതികരിക്കാൻ ഇവിടെ എഴുതുക