ചെന്നൈ: നയന്താര പ്രധാന കഥാപാത്രമായെത്തിയ ‘അന്നപൂരണി’ നെറ്റ്ഫ്ലിക്സില് നിന്നും നീക്കി. ചിത്രം പിന്വലിച്ചതായി നിര്മ്മാതാക്കളിലൊന്നായ സീ സ്റ്റുഡിയോ വാര്ത്താക്കുറിപ്പില് അറിയിച്ചു. ചിത്രത്തിനെതിരെ ഹൈന്ദവ സംഘടനകളുടെ പ്രതിഷേധത്തിന് പിന്നാലെയാണ് നടപടി.
മതവികാരം വൃണപ്പെടുത്തിയതില് മാപ്പ് ചോദിക്കുന്നു എന്നും വിവാദ രംഗങ്ങള് നീക്കുമെന്നും സീ സ്റ്റുഡിയോ പുറത്തിറക്കിയ വാര്ത്താക്കുറിപ്പില് വ്യക്തമാക്കി. സീ സ്റ്റുഡിയോസും നാഡ് സ്റ്റുഡിയോസും ട്രിഡെന്റ് ആര്ട്സും ചേര്ന്നാണ് ചിത്രം നിര്മ്മിച്ചിരിക്കുന്നത്. നിലേഷ് കൃഷ്ണയാണ് ചിത്രം സംവിധാനം ചെയ്തിരിക്കുന്നത്.
അന്നപൂരണി മതവികാരത്തെ വ്രണപ്പെടുത്തിയെന്ന് ചൂണ്ടിക്കാട്ടി മുംബൈ പൊലീസില് പരാതി ലഭിച്ചിരുന്നു. ഡ്രാമ വിഭാഗത്തില്പെടുന്ന ചിത്രത്തിന്റെ തിയറ്റര് റിലീസ് ഡിസംബര് 1 ന് ആയിരുന്നു. ഡിസംബര് 29 നായിരുന്നു ചിത്രം നെറ്റ്ഫ്ലിക്സില് റിലീസായത്. ഒടിടിയില് എത്തിയതിന് പിന്നാലെ ചിത്രം മതവികാരം വ്രണപ്പെടുത്തിയതായി ചില കോണുകളില് നിന്ന് സോഷ്യല് മീഡിയയില് വിമര്ശനം ആരംഭിച്ചിരുന്നു. പിന്നീടാണ് പൊലീസില് പരാതി എത്തിയത്.
പ്രതികരിക്കാൻ ഇവിടെ എഴുതുക