വയനാട്: പൂക്കോട് വെറ്റിനറി കോളേജിലെ വിദ്യാര്ത്ഥി സിദ്ധാർത്ഥന്റെ മരണത്തിൽ നീതി ആവശ്യപ്പെട്ട് വിദ്യാർഥിയുടെ അച്ഛനും മറ്റ് ബന്ധുക്കളും മുഖ്യമന്ത്രി പിണറായി വിജയനെ കാണും. സിബിഐ അന്വേഷണം ആവശ്യമാണെന്ന് മുഖ്യമന്ത്രിയോട് സിദ്ധാർത്ഥന്റെ അച്ഛൻ വ്യക്തമാക്കും. ഉച്ചയ്ക്ക് മുമ്പ് ഇരുവരും തമ്മിൽ കൂടിക്കാഴ്ച നടത്തും. രക്ഷിതാക്കൾ ആവശ്യപ്പെടുന്ന അന്വേഷണം സർക്കാർ നടത്തുമെന്ന് സിപിഎം നേരത്തെ അറിയിച്ചിരുന്നു. അതേസമയം, സിദ്ധാര്ത്ഥനെ ക്രൂരമായി മര്ദിച്ച പ്രധാന പ്രതി സിൻജോ ജോൺസൻ കരാട്ടെ ബ്ലാക്ക് ബെൽറ്റ് ആണെന്ന് പൊലീസ് ഇന്നലെ പറഞ്ഞിരുന്നു.
കൈവിരലുകൾ കൊണ്ട് സിൻജോ കണ്ഠനാളം അമര്ത്തിയതോടെ സിദ്ധാര്ത്ഥന് ദാഹജലം പോലും ഇറക്കാൻ പറ്റാത്ത അവസ്ഥയായി. പ്രതിപ്പട്ടികയിലേക്ക് മറ്റുചിലർ ഉൾപ്പെടാനുള്ള സാധ്യതയും കൂടുതലാണ്. സിദ്ധാര്ത്ഥൻ അനുഭവിച്ചത് കൊടും ക്രൂരതയാണെന്നാണ് വിദ്യാര്ത്ഥികൾ പൊലീസിന് നൽകിയ മൊഴി. കരാട്ടെയില് ബ്ലാക്ക് ബെൽറ്റ് ഉള്ള പ്രധാനപ്രതി സിൻജോ ജോൺസൺ അഭ്യാസ മികവ് മുഴുവൻ സിദ്ധാര്ത്ഥന് മേൽ പ്രയോഗിച്ചു. ഒറ്റച്ചവിട്ടിന് സിദ്ദാർട്ടനെ താഴെയിട്ടു. ശരീരത്തിൽ തള്ളവിരൽ പ്രയോഗം. മര്മ്മം നന്നായി അറിവുള്ള സിൻജോയുടെ കണ്ണില്ലാ ക്രൂരത ആരെയും ഞെട്ടിക്കുന്നതാണ്.
പോസ്റ്റുമോര്ട്ടം റിപ്പോര്ട്ട് അനുസരിച്ച് സിദ്ധാര്ത്ഥൻ ഭക്ഷണവും വെള്ളവും കഴിക്കാതെ തീർത്തും അവശനായിരുന്നു. സിൻജോ കൈവിരലുകള്വെച്ച് കണ്ഠനാളം അമര്ത്തിയിരുന്നു. ഇതുണ്ടാക്കിയ ആഘാതം വളരെ വലുതാണ്. വെള്ളം പോലും ഇറക്കാനായില്ലെന്ന് വിദ്യാര്ത്ഥികൾ പൊലീസിന് മൊഴി നൽകിയെന്നാണ് റിപ്പോർട്ട്. ആള്ക്കൂട്ട വിചാരണ പദ്ധതിയിട്ടതും സിഞ്ചോയാണ്. ഇത് തിരിച്ചിറിഞ്ഞാണ് സിൻജോയെ പൊലീസ് മുഖ്യപ്രതിയാക്കിയതും. കാശിനാഥനാണ് ബെൽറ്റ് കൊണ്ട് തലങ്ങും വിലങ്ങും അടിച്ചത്. എല്ലാവരുടേയും പ്രീതി നേടിയ വിദ്യാര്ത്ഥിയോടുള്ള അസൂയ കൂടി തല്ലിത്തീര്ത്തു എന്ന് വിദ്യാര്ത്ഥികളുടെ മൊഴികളിൽ നിന്ന് പൊലീസ് വായിച്ചെടുത്തിട്ടുള്ളത്.
പ്രതികരിക്കാൻ ഇവിടെ എഴുതുക