പണ്ടുകാലത്ത് വിഷു ആഘോഷം തുടങ്ങുന്നത് ഗൃഹനാഥന് പനസം വെട്ടുന്നതോടെയാണ്. വിഷുവിന് നിര്ബന്ധമായും ഉപയോഗിക്കുന്ന ഒന്നാണ് വരിക്കച്ചക്ക. വിഷു ദിവസം ചക്കയ്ക്ക് പനസം എന്നു മാത്രമേ പറയാൻ പാടുള്ളു.
വിഷു ദിനത്തിൽ ചക്ക വിഭവങ്ങൾ പ്രധാനമാണ്. എരിശ്ശേരിയില് ചക്കയുടെ എല്ലാ ഭാഗങ്ങളും ചേർക്കാറുണ്ട്. ഒരു മുഴുവന് ചക്കച്ചുള, തൊലിയോട് കൂടിയ ചക്കക്കുരു, ചക്കയുടെ കൂഞ്ഞ്, ചക്ക മടല്, ചക്കയുടെ ഏറ്റവും പുറത്തേ മുള്ള് എന്നിവയും എരിശ്ശേരിയില് ചേർക്കാറുണ്ട്.
വള്ളുവനാട് പ്രദേശങ്ങളില് വിഷു ദിവസം കഞ്ഞി സദ്യയായിരിക്കും ഉണ്ടാവുക. വാഴപ്പോള വൃത്താകൃതിയില് ചുരുട്ടി അതില് വാഴയില വച്ച് പഴുത്ത പ്ലാവിലകൊണ്ടാണ് കഞ്ഞി കുടിക്കുക. കഞ്ഞിയുടെ കൂടെ കഴിക്കാന് ചക്ക എരിശ്ശേരിയും ചക്ക വറുത്തതും ഉണ്ടായിരിക്കും.
കേരളത്തിലെ ചില ഭാഗങ്ങളില് ഓണസദ്യയുടേതു പോലെയുള്ള വിഭവസമൃദ്ധമായ സദ്യയും ഒരുക്കാറുണ്ട്. പ്രാതലിന് ചില പ്രദേശങ്ങളിൽ വിഷുക്കട്ട എന്ന വിഭവവും കാണാറുണ്ട്. നാളികേരപ്പാലില് പുന്നെല്ലിന്റെ അരി വേവിച്ച് ജീരകവുമിട്ട് വറ്റിച്ചാണ് വിഷുക്കട്ട ഉണ്ടാക്കുന്നത്. വിഷുക്കട്ടക്ക് മധുരമോ ഉപ്പോ ചേർക്കാറില്ല. ശര്ക്കര പാനിയോ, മത്തനും, പയറും കൊണ്ടുള്ള കറിയോ ഉപയോഗിച്ചായിരിക്കും ഇത് കഴിക്കുക.
പ്രതികരിക്കാൻ ഇവിടെ എഴുതുക