തിരുവനന്തപുരം: നിപ എന്ന മഹാമാരിക്കെതിരെ പോരാടി മരിച്ച സിസ്റ്റര് ലിനി നമ്മെ വിട്ടുപിരിഞ്ഞിട്ട് രണ്ടു വര്ഷം തികയുകയാണ്. നിസ്വാര്ത്ഥമായ ആതുര സേവനത്തിനിടയില് ജീവന് ത്യജിക്കേണ്ടി വന്ന ഈ പെണ്കുട്ടി മലയാളികളുടെ മനസില് നിന്ന് ഒരിക്കലും മാഞ്ഞുപോകില്ല. ലിനിയുടെ ഓര്മകള് മുഖ്യമന്ത്രി പിണറായി വിജയനും ആരോഗ്യമന്ത്രി ശൈലജ ടീച്ചര് ഫേസ്ബുക്കിലൂടെ പങ്കുവച്ചു.
‘ത്യാഗനിര്ഭരമായ ജോലി ചെയ്യുന്നതിനിടയില് ഉണ്ടാവുന്ന ആരോഗ്യ പ്രവര്ത്തകരുടെ മരണം ഏറെ വേദന നല്കുമെങ്കിലും ലിനിയുടെ മരണം ഒരു പോരാട്ട വീര്യമായി ഉള്ളിലുണ്ട്. തന്നെ വൈറസ് ബാധിച്ചത് തന്റെ തെറ്റ് അല്ലായിരിക്കാം, പക്ഷേ, തന്നില് നിന്ന് മറ്റൊരാളിലേക്ക് പകരുന്നത് പൂര്ണമായും തന്റെ തെറ്റും ശ്രദ്ധക്കുറവുമാണെന്ന ബോധ്യം നമ്മളില് ഉണ്ടാക്കാന് ലിനിയുടെ പ്രവര്ത്തനത്തിന് കഴിഞ്ഞിട്ടുണ്ട്. നിപ വൈറസ് ലിനിയില് നിന്ന് മറ്റൊരാളിലേക്ക് പകരാതിരിക്കാന് ലിനി കാണിച്ച മാതൃക കൊറോണ കാലത്ത് നമുക്ക് നല്കുന്ന പാഠം വളരെ വലുതാണ്. ആത്മധൈര്യത്തോടെ പറയാന് കഴിയും കൊറോണയ്ക്ക് എതിരെയുള്ള പോരാട്ടവും നമ്മള് വിജയിക്കുക തന്നെ ചെയ്യും. പ്രിയ ലിനിക്ക് ആദരാഞ്ജലികള്’- ശൈലജ ടീച്ചര് ഫേസ്ബുക്കില് കുറിച്ചു.
ലിനിയെ ഓര്ക്കാതെ ഈ കാലം എങ്ങനെ കടന്നു പോകും? ആ ജീവിതം മറ്റുള്ളവര്ക്ക് ഏറ്റവും പ്രചോദിതമാകുന്നത് ഇക്കാലത്താണെന്ന് മുഖ്യമന്ത്രി പിണറായി വിജയനും ഫേസ്ബുക്കില് കുറിച്ചിരുന്നു. പേരാമ്ബ്ര താലൂക്ക് ആശുപത്രിയില്ജോലി ചെയ്തിരുന്ന ലിനിക്ക് നിപാ ബാധിതരെ ശുശ്രൂഷിക്കുന്നതിനിടെയാണ് വൈറസ് ബാധയേറ്റത്. അര്പണ ബോധത്തോടെ രോഗബാധിതരെ ശുശ്രൂഷിച്ച ലിനി ആരോഗ്യ പ്രവര്ത്തകര്ക്കാകെ മാതൃകയായി മാറി. കോവിഡ് – 19 എന്ന മഹാമാരിയെ ലോകം നേരിട്ടുകൊണ്ടിരിക്കുന്ന വേളയിലാണ് ലിനിയുടെ ഓര്മ്മദിനം കടന്നുപോവുന്നതെന്നും മുഖ്യമന്ത്രി കുറിച്ചു.
മുഖ്യമന്ത്രിയുടെ ഫേസ്ബുക്ക് കുറിപ്പ്
ലിനിയെ ഓര്ക്കാതെ ഈ കാലം എങ്ങനെ കടന്നു പോകും? ആ ജീവിതം മറ്റുള്ളവര്ക്ക് ഏറ്റവും പ്രചോദിതമാകുന്നത് ഇക്കാലത്താണ്. നിപയെന്ന മഹാമാരിക്കെതിരായി പോരാടി സിസ്റ്റര് ലിനി വിടവാങ്ങിയിട്ട് ഇന്നേക്ക് രണ്ടു വര്ഷം തികയുന്നു. പേരാമ്ബ്ര താലൂക്ക് ആശുപത്രിയില്ജോലി ചെയ്തിരുന്ന ലിനിക്ക് നിപാ ബാധിതരെ ശുശ്രൂഷിക്കുന്നതിനിടെയാണ് വൈറസ് ബാധയേറ്റത്. അര്പണ ബോധത്തോടെ രോഗബാധിതരെ ശുശ്രൂഷിച്ച ലിനി ആരോഗ്യ പ്രവര്ത്തകര്ക്കാകെ മാതൃകയായി മാറി. കോവിഡ് – 19 എന്ന മഹാമാരിയെ ലോകം നേരിട്ടുകൊണ്ടിരിക്കുന്ന വേളയിലാണ് ലിനിയുടെ ഓര്മ്മദിനം കടന്നുപോവുന്നത്. ലിനിയെ പോലുള്ള ആയിരക്കണക്കിന് ആരോഗ്യ പ്രവര്ത്തകരാണ് ഈ പോരാട്ടത്തില് കേരളത്തിന്റെ കരുത്ത്. രോഗികളെ ശുശ്രൂഷിക്കാനും രോഗം പടരാതിരിക്കാനും കാട്ടുന്ന ജാഗ്രത നമ്മുടെ നാടിനെ സുരക്ഷിതമാക്കുന്നതില് പ്രധാന പങ്കുവഹിക്കുന്നുണ്ട്. ലോകത്തിന്റെ മുക്കിലും മൂലയിലും മലയാളികളായ ആരോഗ്യ പ്രവര്ത്തകര് കോവിഡിനെതിരായ പോരാട്ടത്തില് എല്ലാം മറന്ന് മുന്നിലുണ്ട്. രോഗബാധിതരെ ശുശ്രൂഷിക്കുന്നതിനിടയില് വൈറസ് ബാധ ഏറ്റ ആരോഗ്യ പ്രവര്ത്തകര് രോഗമുക്തിക്കു ശേഷം അതേ ജോലിയിലേക്ക് തന്നെയെന്ന് പ്രഖ്യാപിക്കുന്നത് നമുക്കാകെ ധൈര്യം നല്കുന്നു. ലിനിയുടെ ജീവിതസന്ദേശം പ്രസക്തമാകുന്നത് ഇവിടെയാണ്. കോവിഡിനെതിരായ പോരാട്ടത്തില് ലിനിയുടെ ഓര്മ്മകള് നമുക്ക് കരുത്തേകും.
പ്രതികരിക്കാൻ ഇവിടെ എഴുതുക