തിരുവനന്തപുരം വിമാനത്താവളം അദാനി ഗ്രൂപ്പിന് കൈമാറിയതിനെതിരെ സര്ക്കാര് ഹൈക്കോടതിയില് ഉപ ഹർജി നല്കിയേക്കും. എജിയുടെ ഉപദേശം ലഭിച്ച ശേഷമായിരിക്കും ഇതേ സംബന്ധിച്ച് അന്തിമ തീരുമാനമുണ്ടാകുക. ഹൈക്കോടതിയിലെ കേസ് തീര്പ്പാക്കാതെ സ്വകാര്യ കമ്പനിക്ക് വിമാനത്താവളം കൈമാറിയത് ചോദ്യം ചെയ്തായിരിക്കും ഉപ ഹർജി. എയര്പോര്ട്ടിന്റെ മേല്നോട്ടവും നടത്തിപ്പും സംസ്ഥാന സര്ക്കാരിന് മുഖ്യപങ്കാളിത്തമുള്ള സ്പെഷ്യല് പര്പ്പസ് വെഹിക്കിളില് നിക്ഷിപ്തമാക്കണം എന്നാണ് സംസ്ഥാന സര്ക്കാര് ആവശ്യപ്പെട്ടത് എന്ന് മുഖ്യമന്ത്രി സര്വകക്ഷി യോഗത്തില് വ്യക്തമാക്കിയിരുന്നു.
കേന്ദ്ര വ്യോമയാന മന്ത്രിക്ക് രണ്ടു തവണയും പ്രധാനമന്ത്രിക്ക് മൂന്നുവട്ടവും ഇക്കാര്യമുന്നയിച്ച് കത്ത് എഴുതിയിട്ടുണ്ട്. അദാനി എന്റര്പ്രൈസസ് കൂടുതല് തുക ക്വാട്ട് ചെയ്തതിനാല് അതേ തുക ഓഫര് ചെയ്യാന് സംസ്ഥാന സര്ക്കാര് തയ്യാറാണ് എന്നും അറിയിച്ചു. സംസ്ഥാന സര്ക്കാരിന് കൊച്ചി അന്താരാഷ്ട്ര വിമാനത്താവളം പൊതുപങ്കാളിത്തത്തോടെ വിജയകരമായി നടപ്പാക്കിയ അനുഭവ പരിജ്ഞാനമുണ്ട്. ഇതേ മാതൃകയില് തന്നെ കണ്ണൂര് അന്താരാഷ്ട്ര വിമാനത്താവളവും നടത്തുന്നുണ്ട്. തിരുവനന്തപുരം അന്താരാഷ്ട്ര വിമാനത്താവളത്തിന്റെ മേല്നോട്ടവും നടത്തിപ്പും ഏറ്റെടുക്കാന് ബിഡ് ചെയ്ത സ്വകാര്യ സംരംഭകന് ഇത്തരത്തിലുള്ള മുന്പരിചയമില്ലെന്നും സര്ക്കാര് ചൂണ്ടിക്കാട്ടുന്നു.
അതേസമയം. കേന്ദ്ര സര്ക്കാര് തീരുമാനത്തിനെതിരെ മുഖ്യമന്ത്രി വീണ്ടും പ്രധാനമന്ത്രിക്ക് കത്തയച്ചു. സര്വകക്ഷിയോഗത്തില് ഉയര്ന്ന അഭിപ്രായങ്ങള് കൂടി ഉൾപ്പെടുത്തിയാണ് കത്തയച്ചിരിക്കുന്നത്. വിമാനത്താവളം പൊതുമേഖലയില് നിലനിര്ത്തണമെന്നാണ് കേരളത്തിന്റെ പൊതു അഭിപ്രാമെന്നും തീരുമാനം പുനപരിശോധിക്കണമെന്നും കത്തില് ആവശ്യപ്പെടുന്നു.
പ്രതികരിക്കാൻ ഇവിടെ എഴുതുക