ഡൽഹി: വ്യാഴാഴ്ച രാത്രി ഫേസ്ബുക്ക്, ഇൻസ്റ്റാഗ്രാം, വാട്ട്സ്ആപ്പ് എന്നിവയുടെ പ്രവർത്തനം നിലച്ചത് നിങ്ങളിൽ പലരും അറിഞ്ഞ് കാണില്ല. കാരണം നിങ്ങൾ നല്ല ഉറക്കത്തിലായിരിക്കാം. എന്നാൽ ഉറങ്ങാതിരിക്കുന്നവരെ ഇത് വളരെയേറെ അസ്വസ്ഥരാക്കിയിട്ടുണ്ടാകും.
ഇന്ത്യയുൾപ്പെട്ട പലരാജ്യങ്ങളിലും 30 മിനുറ്റിലധികം നേരം ഫേസ്ബുക്കും ഇൻസ്റ്റാഗ്രാമും വാട്സാപ്പും ലഭിക്കാൻ തടസ്സം നേരിട്ടു. ഈ സമയത്ത് ഉപയോക്താക്കൾക്ക് ആപ്പ് ലോഡ് ചെയ്യാൻ കഴിയാതെ വന്നു. രാത്രി വളരെ വൈകിയാണ് ഇങ്ങനെ ഒരു സംഭവം നടന്നത്. അതിനാൽ തന്നെ പലരും ഇത് അറിഞ്ഞിട്ടില്ല
എന്നാൽ മറ്റ് രാജ്യങ്ങളിൽ നിന്നുള്ള ഉപയോക്താക്കൾ അവരുടെ സോഷ്യൽ മീഡിയ ആപ്ലിക്കേഷനുകളിൽ പ്രശ്നങ്ങൾ ട്വിറ്ററിൽ റിപ്പോർട്ട് ചെയ്തു. ഒരു മാസത്തിനുള്ളിൽ ഇത് രണ്ടാം തവണയാണ് ഫേസ്ബുക്കിലും അതിന്റെ ആപ്പുകളിലും തടസ്സം നേരിടുന്നത്.
ഇന്ത്യൻ സമയം പുലർച്ചെ 4 മണിയോടെയാണ് കുറച്ച് നേരത്തേക്ക് തകരാർ സംഭവിച്ചത്. ഫേസ്ബുക്കിൽ 154,100 ൽ അധികം ഔട്ടേജ് റിപ്പോർട്ടുകളും ഇൻസ്റ്റാഗ്രാമിൽ 80,200 ഉം വാട്ട്സ്ആപ്പിൽ 1,300 ഉം റിപ്പോർട്ട് ചെയ്തിട്ടുണ്ട്.
ഫേസ്ബുക്കിലെ 57 ശതമാനം ഉപയോക്താക്കൾ പൂർണ്ണമായും ബ്ലാക്ക്ഔട്ട് നേരിട്ടതായും 37 ശതമാനം പേർക്ക് ലോഗിൻ ചെയ്യുന്നതിൽ പ്രശ്നമുണ്ടായതായും 4 ശതമാനം ഉപയോക്താക്കൾക്ക് സോഷ്യൽ മീഡിയ ആപ്പിൽ ചിത്രങ്ങൾ ലോഡ് ചെയ്യുന്നതുമായി പ്രശ്നങ്ങളുണ്ടായെന്നും ഡൗൺഡെക്ടർ റിപ്പോർട്ട് പറയുന്നു.
പ്രശ്നം വളരെ വേഗത്തിൽ പരിഹരിക്കാനായെന്നും കുറച്ച് മണിക്കൂറുകൾക്ക് ശേഷം സേവനങ്ങൾ പുനരാരംഭിച്ചെന്നും ഫേസ്ബുക്ക് ട്വീറ്റ് ചെയ്തിട്ടുണ്ട്. സാങ്കേതിക പ്രശ്നമൂലമാണ് തകരാർ ഉണ്ടായതെന്നാണ് ഫേസ്ബുക്ക് നൽകുന്ന വിശദീകരണം.
പ്രതികരിക്കാൻ ഇവിടെ എഴുതുക