ഹൈദരാബാദ്: തെലങ്കാന ബിആര്എസിലെ എംഎല്എയായ ജി ലാസ്യ നന്ദിത (37) വാഹനാപകടത്തില് മരണപ്പെട്ടു. ഇന്ന് പുലര്ച്ചെ എക്സ്പ്രസ് വേയില് നിയന്ത്രണം വിട്ട കാര് ഡിവൈഡറിലേക്ക് ഇടിച്ചു കയറിയായിരുന്നു അപകടം നടന്നത്. സെക്കന്തരാബാദ് കന്റോണ്മെന്റ് മണ്ഡലത്തിലെ എംഎല്എയാണ് മരണപ്പെട്ട ലാസ്യ. സംഗറെഡ്ഢി ജില്ലയിലെ സുല്ത്താന്പൂര് നെഹ്റു ഔട്ടര് റിംഗ് റോഡിലായിരുന്നു അപകടം. ഡ്രൈവര് ഉറങ്ങി പോയതാകാം അപകടത്തിന് കാരണമെന്നാണ് പോലീസിന്റെ പ്രാഥമിക നിഗമനം.
നിയന്ത്രണം നഷ്ടപ്പെട്ടതോടെ കാര് മെറ്റല് ബാരിയറില് ഇടിച്ചു കയറുകയായിരുന്നു. ഉടന് തന്നെ എംഎല്എയെ അടുത്തുള്ള സ്വകാര്യ ആശുപത്രിയില് എത്തിച്ചെങ്കിലും മരണം സ്ഥിരീകരിക്കുകയായിരുന്നുവെന്ന് പൊലീസ് വ്യക്തമാക്കി. സംഭവത്തില് പരുക്കേറ്റ ഡ്രൈവറും എംഎല്എയുടെ പിഎയും ആശുപത്രിയില് ചികിത്സ തേടി. സംഭവത്തില് വിശദമായ അന്വേഷണം നടത്തുന്നുണ്ടെന്ന് ഉന്നത പൊലീസ് ഉദ്യോഗസ്ഥന് മാധ്യമങ്ങളോട് പറഞ്ഞു.
ബിആര്എസ് മുന് നേതാവും എംഎല്എയുമായിരുന്ന ജി സായന്നയുടെ മകളാണ് ലാസ്യ നന്ദിത. 2015ലാണ് ലാസ്യയുടെ രാഷ്ട്രീയ ജീവിതം ആരംഭിച്ചത്. 2023ല് നവംബറില് നടന്ന തെരഞ്ഞെടുപ്പിലാണ് സെക്കന്തരാബാദ് കന്റോണ്മെന്റ് മണ്ഡലത്തില് നിന്ന് എംഎല്എയായി എത്തുന്നത്. 17,169 വോട്ടുകള്ക്കായിരുന്നു ബിജെപി സ്ഥാനാര്ത്ഥിയെ പരാജയപ്പെടുത്തിയായിരുന്നു ലാസ്യയുടെ വിജയം. നന്ദിതയുടെ മരണത്തില് കെ ചന്ദ്രശേഖര് റാവു, തെലങ്കാന മുഖ്യമന്ത്രി രേവന്ത് റെഡ്ഢി അടക്കമുള്ള നേതാക്കള് അനുശോചനം അറിയിച്ചു.
പ്രതികരിക്കാൻ ഇവിടെ എഴുതുക