വയനാട് പൂക്കോട് വെറ്ററിനറി കോളജ് വിദ്യാര്ത്ഥി മരിച്ച സംഭവത്തിൽ പിടിയിലായ പ്രതികള്ക്കെതിരെ ക്രിമിനല് ഗൂഢാലോചനാക്കുറ്റം ചുമത്തും. ഗൂഢാലോചന നടന്നുവെന്നതിന്റെ വ്യക്തമായ തെളിവുകള് ലഭിച്ചെന്ന് പൊലീസ് അറിയിച്ചു. മര്ദനത്തിന് പിന്നില് ആസൂത്രണമുണ്ടെന്ന് അന്വേഷണത്തിൽ കണ്ടെത്തി. വീട്ടിലേക്ക് പോയ സിദ്ധാര്ത്ഥനെ വിളിച്ചുവരുത്തിയത് ഗൂഢാലോചനയുടെ ഭാഗമായെന്ന് പൊലീസ് പറയുന്നു.
മര്ദനത്തിന് മുന്പും ഗൂഢാലോചന നടന്നതായി അന്വേഷണ സംഘം കണ്ടെത്തി. കേസിലെ 18 പ്രതികളും പിടിയിലായിരുന്നു. കൂടാതെ റിമാന്ഡ് റിപ്പോര്ട്ടിലെ കൂടുതല് വിവരങ്ങള് പോലീസ് പുറത്തുവന്നു. വീട്ടിലേക്ക് പോയ സിദ്ധാര്ത്ഥന് എറണാകുളത്ത് നിന്ന് മടങ്ങി വന്ന ശേഷം 16ന് പകല് ഹോസ്റ്റലില് തങ്ങി. സ്പോര്ട്സ് ഡേ ആയതിനാല് ഹോസ്റ്റലില് ആരും ഉണ്ടായിരുന്നില്ല. രാത്രി ഒന്പതുമണിയോടെ സിദ്ധാര്ത്ഥനെ കുന്നിന് സമീപത്തേക്ക് എത്തിച്ചു. ഡാനിഷും രഹാന് ബിനോയിയും അല്ത്താഫും ചേര്ന്നാണ് സിദ്ധാര്ത്ഥനെ കുന്നിന് സമീപത്തേക്ക് എത്തിക്കുന്നത്.
കുന്നിന് സമീപത്ത് വെച്ച് സഹപാഠിയോട് മോശമായി പെരുമാറിയെന്ന് ആരോപിച്ച് സിദ്ധാർത്ഥിന്റെ മര്ദിച്ചു. ഒരു മണിക്കൂറോളം ചോദ്യം ചെയ്യലും മര്ദനവും നീണ്ടതായി റിമാന്ഡ് റിപ്പോര്ട്ടില് പരാമർശിക്കുന്നു. എസ്എഫ്ഐ യൂണിറ്റ് സെക്രട്ടറിയാണ് സിദ്ധാര്ത്ഥനെ ഹോസ്റ്റലിലെത്തിക്കാന് പറഞ്ഞത്. തുടര്ന്ന് ഹോസ്റ്റലിലെ 21-ാം നമ്പര് മുറിയില് എത്തിച്ച് ചോദ്യം ചെയ്യലും മര്ദനവും തുടര്ന്നു. ഇവിടെവെച്ച് ഗ്ലൂഗണ് വയര് ഉപയോഗിച്ച് സിന്ജോ ജോണ്സണ് നിരവധി തവണ സിദ്ധാര്ത്ഥനെ ആക്രമിച്ചു.
പ്രതികരിക്കാൻ ഇവിടെ എഴുതുക