വയനാട്: ബി.ജെ.പി സംസ്ഥാന അധ്യക്ഷൻ കെ. സുരേന്ദ്രൻ ജനവിധി തേടുന്ന വയനാട്ടിൽ വോട്ടര്മാരെ ആകർഷിക്കാൻ ബി.ജെ.പി വ്യാപകമായി ഭക്ഷ്യക്കിറ്റുകള് വിതരണം ചെയ്യുന്നതായി ആരോപണം ഉയരുന്നു. വിതരണം ചെയ്യാൻ തയാറാക്കിയ ആയിരത്തിയഞ്ഞൂറോളം കിറ്റുകള് സുൽത്താൻ ബത്തേരിയില് നിന്ന് പിടിച്ചെടുത്തു. മാനന്തവാടി അഞ്ചാം മൈലിലെയും കല്പ്പറ്റ മേപ്പാടി റോഡിലെയും സൂപ്പര്മാര്ക്കറ്റുകളില് നിന്ന് സമാനമായ രീതിയില് കിറ്റുകള് വിതരണത്തിന് കൊണ്ടുപോയതായും ആരോപണമുണ്ട്.
കിറ്റ് വിഷയത്തിൽ തെരഞ്ഞെടുപ്പ് കമ്മീഷൻ ഇടപെടണമെന്നാവശ്യപ്പെട്ട് എല്ഡിഎഫും യുഡിഎഫും രംഗത്തെത്തി. കിറ്റ് തയ്യാറാക്കിയത് ബി.ജെ.പിയാണെന്ന് ടി.സിദ്ധിഖ് എം.എല്.എ ആരോപണം ഉന്നയിച്ചു. 1500 കിറ്റുകൾക്ക് ഓർഡർ നൽകിയത് ബി.ജെ.പി പ്രാദേശിക നേതാക്കളാണെന്നും അദ്ദേഹം വ്യക്തമാക്കുന്നു.’ആദിവാസി കോളനികളിലെ വോട്ട് നേടാനാണ് കിറ്റ് തയ്യാറാക്കിയത്, സംഭവത്തിൽ സമഗ്ര അന്വേഷണം വേണമെന്നും അദ്ദേഹം ആവശ്യം ഉന്നയിച്ചു.
രഹസ്യ വിവരം ലഭിച്ചതിന്റെ അടിസ്ഥാനത്തിൽ പൊലീസ് സംഘടിപ്പിച്ച പരിശോധനയിലാണ് സുൽത്താൻ ബത്തേരിയിലെ മൊത്തവിതരണ സ്ഥാപനത്തിന് മുന്നിൽ ലോറിയിൽ കയറ്റിയ നിലയിൽ ആവശ്യസാധനങ്ങൾ അടങ്ങിയ കിറ്റുകൾ കണ്ടെത്തിയത്. പഞ്ചസാര, തേയിലപ്പൊടി, വെളിച്ചെണ്ണ, സോപ്പ്, സോപ്പ് പൊടി, ബിസ്ക്കറ്റ്, റസ്ക് തുടങ്ങിയവയായിരുന്നു കിറ്റിലുണ്ടായിരുന്നത്. ചിലതിൽ വെറ്റില, അടക്ക, പുകയില എന്നിവയും കണ്ടെത്തി.
പ്രതികരിക്കാൻ ഇവിടെ എഴുതുക