ഡാഷ് ഡയറ്റിനെക്കുറിച്ച് കേട്ടിട്ടുണ്ടോ? ഡയറ്ററി അപ്രോച്ചസ് ടു സ്റ്റോപ് ഹൈപ്പർ ടെൻഷൻ എന്നാണ് ഡാഷ് ഡയറ്റ് (DASH diet) അറിയപ്പെടുന്നത്. ഇപ്പോൾ ചെറുപ്പക്കാരിലടക്കം ഉയർന്ന ബി.പി കൂടുതലായി കണ്ടുവരുന്ന സാഹചര്യത്തിൽ ബി.പി നിയന്ത്രിക്കാൻ സഹായിക്കുന്ന ഡയറ്റ് പ്ലാൻ എന്ന നിലയിൽ ഡാഷ് ഡയറ്റിന്റെ പ്രാധാന്യം വർധിച്ച് വരികയാണ്.
രക്താതിമർദ്ദത്തിനുള്ള സാധ്യത കുറയ്ക്കുക മാത്രമല്ല, 75 വയസിന് താഴെയുള്ളവരിൽ ഹൃദയസ്തംഭനവും കുറയ്ക്കാനും ഡാഷ് ഡയറ്റ് സഹായിക്കുമെന്ന് അമേരിക്കൻ ജേണൽ ഓഫ് പ്രിവന്റീവ് മെഡിസിനിൽ പ്രസിദ്ധീകരിച്ച ഗവേഷണം സൂചിപ്പിക്കുന്നു.
ഡാഷ് ഡയറ്റ് ലീൻ പ്രോട്ടീൻ ഉള്ള മാംസം കഴിക്കുന്നത് പ്രോത്സാഹിപ്പിക്കുന്നു. കൊഴുപ്പ് കുറഞ്ഞ പാൽ ഉത്പന്നങ്ങൾ, മൈക്രോ ന്യൂട്രിയന്റുകൾ അടങ്ങിയ ഭക്ഷണങ്ങൾ എന്നിവയാണ് ഈ ഡയറ്റിൽ കൂടുതലായി ഉൾപ്പെടുത്തുന്നത്. കൂടാതെ, പ്രതിദിനം സോഡിയം കഴിക്കുന്നത് 1500 മില്ലിഗ്രാമായി പരിമിതപ്പെടുത്താൻ ഡാഷ് ഡയറ്റ് പ്രോത്സാഹിപ്പിക്കുന്നു.
ഡാഷ് ഡയറ്റ് പ്രധാനമായും പഴങ്ങൾ, പച്ചക്കറികൾ, ധാന്യങ്ങൾ, കൊഴുപ്പ് കുറഞ്ഞ പാൽ ഉത്പന്നങ്ങൾ, മത്സ്യം, ചിക്കൻ, ബീൻസ്, വിത്ത് പരിപ്പ് മുതലായവയുടെ ഉപഭോഗത്തിൽ ശ്രദ്ധ കേന്ദ്രീകരിക്കുന്നു. പാക്ക്ഡ് ഫുഡ്, സംസ്കരിച്ച ഭക്ഷണങ്ങൾ, ശുദ്ധീകരിച്ച മാംസം എന്നിവയുടെ ഉപഭോഗം ഡാഷ് ഡയറ്റ് അനുവദിക്കുന്നില്ല. സോഡിയം കുറവോ ഇല്ലാത്തതോ ആയ ഭക്ഷണങ്ങൾ തിരഞ്ഞെടുക്കുക. അച്ചാറുകൾ സ്മോക്ക്ഡ് ഫുഡ് എന്നിവ ഒഴിവാക്കുക.
ചോളം, ഓട്സ്, ഗോതമ്പ് ബ്രെഡ്, ബ്രൗൺ റൈസ്, ധാന്യങ്ങൾ തുടങ്ങിയവ കഴിക്കുന്നത് നാരുകൾ ലഭ്യമാക്കും. പച്ചക്കറികളിൽ നിന്ന് നിങ്ങൾക്ക് നാരുകൾ, വിറ്റാമിനുകൾ, ധാതുക്കൾ എന്നിവ ലഭിക്കും. അവയിൽ കലോറിയും കൊഴുപ്പും കുറവാണ്, ഇത് രക്തസമ്മർദ്ദം കുറയ്ക്കുന്നതിനുള്ള ഒരു മികച്ച മാർഗമാണ്. നാരുകളുടെയും ഹൃദയാരോഗ്യത്തിന് സഹായിക്കുന്ന വിറ്റാമിനുകളുടെയും മികച്ച ഉറവിടമാണ് പഴങ്ങൾ.
ഭൂരിഭാഗം പഴങ്ങളിലും പൊട്ടാസ്യം, മഗ്നീഷ്യം എന്നിവ അടങ്ങിയിരിക്കുന്നു. ഇത് രക്തസമ്മർദ്ദം കുറയ്ക്കാൻ സഹായിക്കുന്നു. പരിപ്പ്, പയറുവർഗങ്ങൾ, വിത്തുകൾ എന്നിവയിൽ ധാരാളമായി മഗ്നീഷ്യം, പ്രോട്ടീൻ, നാരുകൾ എന്നിവ അടങ്ങിയിട്ടുണ്ട്. ലഘുഭക്ഷണമായി നട്സുകൾ കഴിക്കുന്നതും ആരോഗ്യത്തിന് ഗുണം ചെയ്യും.
രക്തസമ്മർദ്ദം കുറയ്ക്കുന്നതിനുമപ്പുറം, ശരീരഭാരം കുറയ്ക്കൽ, ക്യാൻസർ സാധ്യത കുറയ്ക്കൽ എന്നിവയുൾപ്പെടെ നിരവധി ആരോഗ്യഗുണങ്ങളും ഡാഷ് ഡയറ്റ് വാഗ്ദാനം ചെയ്യുന്നു. എന്നിരുന്നാലും, ശരീരഭാരം കുറയ്ക്കാൻ സഹായിക്കുന്ന ഭക്ഷണക്രമം എന്ന രീതിയിൽ ഡാഷ് ഡയറ്റിനെ സമീപിക്കേണ്ടതില്ല. കാരണം ഇത് അടിസ്ഥാനപരമായി രക്തസമ്മർദ്ദം കുറയ്ക്കുന്നതിന് രൂപകൽപ്പന ചെയ്തിട്ടുള്ളതാണ്. ശരീരഭാരം കുറയുന്നു എന്നത് ഡാഷ് ഡയറ്റിന്റെ എക്സ്ട്രാ ആനുകൂല്യമാണ്.
ഇൻസുലിൻ പ്രതിരോധം മെച്ചപ്പെടുത്താനും പ്രമേഹ സാധ്യത കുറയ്ക്കാനും ഡാഷ് ഡയറ്റ് സഹായകരമാണ്. മറ്റൊരു ആരോഗ്യ ഗുണം, ഹൃദ്രോഗ സാധ്യത കുറയ്ക്കുന്നു എന്നതാണ്. സ്ത്രീകളിൽ അടുത്തിടെ നടത്തിയ ഒരു പഠനത്തിൽ, ഡാഷ് ഡയറ്റ് ഹൃദ്രോഗ സാധ്യത 20 ശതമാനത്തോളവും ഹൃദയാഘാത സാധ്യത 29 ശതമാനത്തോളവും കുറക്കുമെന്നാണ് കണ്ടെത്തിയത്. ഡയറ്റിൽ പഴങ്ങളും പച്ചക്കറികളും കൂടുതലായി ഉൾപ്പെടുത്തിയതിന്റെ ആനുകൂല്യങ്ങൾ കൂടിയാണ് ഈ ആരോഗ്യഗുണങ്ങൾ.
പ്രതികരിക്കാൻ ഇവിടെ എഴുതുക