മാഡ്രിഡ്: ബാഴ്സലോണ വിടാനൊരുങ്ങുന്നുവെന്ന തീരുമാനത്തിൽ നിന്ന് ലയണൽ മെസി പിൻമാറുന്നതായി സൂചന. 2021വരെ മെസി ബാഴ്സയിൽ തുടരുമെന്ന് അദ്ദേഹത്തിന്റെ പിതാവും ഏജന്റുമായ ജോർജി മെസി സൂചന നൽകി.
ബാഴ്സലോണയുമായുള്ള ചർച്ചകൾ നന്നായി നടന്നുവെന്ന് ജോർജി മെസി മാധ്യമങ്ങളോട് പ്രതികരിച്ചു. ഒരു കരാറിലെത്താൻ ഇനിയും അവസരമുണ്ടെന്നും അദ്ദേഹം പറഞ്ഞതായാണ് റിപ്പോർട്ട്.
ബാർത്തോമിയുമായുള്ള കൂടിക്കാഴ്ചയ്ക്ക് ശേഷം ഒരു സീസൺ കൂടി മെസി തുടരാൻ അർജന്റീന തീരുമാനിക്കാനുള്ള സാധ്യത വർദ്ധിച്ചതായി സ്പാനിഷ് മാധ്യമമായ മുണ്ടോ ഡിപോർടിവോ റിപ്പോർട്ട് ചെയ്തു.
2021 ൽ നിലവിലെ കരാർ അവസാനിക്കുന്നതുവരെ മെസി ബാഴ്സലോണയിൽ തുടരുമോ എന്ന ചോദ്യത്തിന് ജോർജി മെസി അതെ എന്നാണ് ഉത്തരം നൽകിയതെന്ന് ഗോൾ റിപ്പോർട്ട് ചെയ്തിരിക്കുന്നു.
സ്പാനിഷ് ക്ലബ്ബ് ബാഴ്സലോണയിൽ ലയണൽ മെസ്സിയുടെ ഭാവി തീരുമാനിക്കാനായി ക്ലബ്ബ് പ്രസിഡന്റ് ജോസഫ് ബർത്തോമ്യുവുമായി കൂടിക്കാഴ്ച നടത്തുന്നതിന് ജോർജി മെസി ബുധനാഴ്ചയാണ് എത്തിയത്.
ചാമ്പ്യൻസ് ലീഗ് ക്വാർട്ടർ ഫൈനലിൽ ബയേൺ മ്യൂണിക്കിനെതിരേ 8-2ന്റെ കൂറ്റൻ തോൽവി വഴങ്ങി ബാഴ്സലോണ പുറത്തായതിന് പിന്നാലെയാണ് മെസി ടീം വിടുകയെന്ന കടുത്ത തീരുമാനത്തിലെത്തിയത്.
പ്രതികരിക്കാൻ ഇവിടെ എഴുതുക