ദക്ഷിണാഫ്രിക്കന് പര്യടനത്തിന് മുന്നോടിയായി ഇന്ത്യന് ടെസ്റ്റ് ടീം നായകന് വിരാട് കോലി ഇന്ന് മാധ്യമങ്ങളെ കാണും. ഇന്ന് ഉച്ചക്ക് ഒരു മണിക്കാണ് വിരാട് കോലി മാധ്യമങ്ങളെ കാണുക. ഏകദിന നായകപദവി നഷ്ടമായ ശേഷം കോലി ഇതുവരെ പ്രതികരിച്ചിട്ടില്ല. രോഹിത്ത് ശര്മ്മയുമായി ഭിന്നതയിലെന്നും ഏകദിന പരമ്പരയിൽ നിന്ന് പിന്മാറുമെന്നുളള അഭ്യൂഹങ്ങള്ക്കിടെ കോലിയുടെ വാര്ത്താസമ്മേളനം പ്രധാനമാണ്.
ഒരു ട്വീറ്റിലൂടെയായിരുന്നു ബി.സി.സി.ഐ പുതിയ നായകനെ തീരുമാനിച്ചത്. അതിനാൽ തന്നെ കോലിയുടെ ആദ്യ പ്രതികരണത്തിന് ഏറെ പ്രാധാന്യമുണ്ട്. പരിശീലകന് രാഹുല് ദ്രാവിഡും വാര്ത്താസമ്മേളനത്തിൽ പങ്കെടുക്കും. ഇന്ത്യന് ക്രിക്കറ്റ് ടീമിന്റെ ദക്ഷിണാഫ്രിക്കന് പര്യടനത്തില് വിരാട് കോലി ഏകദിന പരമ്പര കളിക്കില്ല എന്ന റിപ്പോര്ട്ട് ഇന്നലെ പുറത്തുവന്നിരുന്നു.
കുടുംബത്തിനൊപ്പം സമയം ചിലവഴിക്കുന്നതിന് വേണ്ടിയാണ് വിട്ടുനില്ക്കുന്നതെന്നാണ് സൂചന. ഇക്കാര്യം കോലി ബിസിസിഐയെ അറിയിച്ചു എന്നായിരുന്നു റിപ്പോര്ട്ട്. കോലിയെ ഏകദിന നായകപദവിയില് നിന്ന് നീക്കിയതിന് ശേഷം ടീം ഇന്ത്യയുടെ ആദ്യ പരമ്പരയാണിത്.
ടീമിനുള്ളിലെ അധികാരത്തർക്കത്തിൽ മുൻ നായകർ അടക്കം പരസ്യപ്രതികരണം നടത്തുന്ന സാഹചര്യത്തിൽ കൂടിയാണ് കോലി മാധ്യമങ്ങളെ കാണുന്നത്. അതിനാൽ തന്നെ കോലിയുടെ പ്രതികരണം ശ്രദ്ധേയമാകും. ദക്ഷിണാഫ്രിക്കൻ പര്യടനത്തിനുള്ള ടെസ്റ്റ് ടീം ഇന്ന് ജൊഹന്നസ്ബർഗിലേക്ക് തിരിക്കും.
പ്രതികരിക്കാൻ ഇവിടെ എഴുതുക