വർഷങ്ങൾ എത്ര കഴിഞ്ഞാലും മലയാളികളുടെ മനസ്സിൽ എന്നും നിറഞ്ഞു നിൽക്കുന്ന നടനാണ് കലാഭവൻ മണി. അദ്ദേഹം അവതരിപ്പിച്ച കഥാപാത്രങ്ങൾ, പാടിയ നാടൻ പാട്ടുകൾ, സ്റ്റേജ് പരിപാടികൾ ഇതെല്ലാം ഇപ്പോഴും റിപ്പീറ്റ് അടിച്ചു കാണുന്നവരാണ് ഒട്ടുമിക്ക ആരാധകരും. ആരധകർ മാത്രമല്ല അദ്ദേഹത്തെ അടുത്തറിഞ്ഞ സഹ പ്രവർത്തകർ പോലും ഇന്നും അദ്ദേഹത്തെക്കുറിച്ചോർത്ത് കണ്ണ് നിറയുന്നവരാണ്.അടുത്തിടെ ഒരു ടിവി പരിപാടിയിൽ ഹാസ്യ നടിയും അവതാരകയുമായ സുബി കലാഭവൻ മണിയെക്കുറിച്ചു പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്.
ആദ്യമായി തന്റെ അമ്മയോട് സംസാരിച്ചപ്പോൾ തന്റെ കല്യാണക്കാര്യം ഉത്തരവാദിത്തത്തോടെ ചർച്ച ചെയ്തു മണി എന്നാണ് സുബി പറയുന്നത്. അടുത്തിടെ അമൃത ടിവിയിലെ റെഡ് കാർപെറ്റ് എന്ന പരിപാടിയിലാണ് സുബി തന്റെ ഓർമ്മകൾ പങ്കുവെച്ചത്.
“ഞങ്ങൾ അന്ന് ഒരു യുഎസ് ഷോയിലായിരുന്നു. മണിച്ചേട്ടനും ഞങ്ങൾക്കൊപ്പം ഉണ്ടായിരുന്നു. ആദ്യമൊക്കെ അദ്ദേഹത്തിന് എന്നെ വല്യ പരിചയം ഇല്ലായിരുന്നു. പിന്നീട് ഞങ്ങൾ പരിചയപ്പെട്ടു. അന്ന് അദ്ദേഹം പറഞ്ഞു ‘ആദ്യമൊന്നും എനിക്ക് നിന്നെ ഇഷ്ടമല്ലായിരുന്നു, നീ ഭയങ്കര അഹങ്കാരിയാണ് എന്നാണ് ഞാൻ വിചാരിച്ചത്’ എന്ന്. പിന്നെ അടുപ്പമായിക്കഴിഞ്ഞു ഒരു ദിവസം അദ്ദേഹം പറഞ്ഞു എന്റെ അമ്മയോട് സംസാരിക്കണം എന്ന്.
അന്ന് എന്റെ അമ്മയോട് മണിചേട്ടന് പറഞ്ഞത് ഇങ്ങനെ – ‘ഇവളൊരു നല്ല കൊച്ചാണ്, ആദ്യം എനിക്ക് വല്യ ഇഷ്ടം ഇല്ലായിരുന്നു, ഇപ്പോ മനസിലായി നല്ല കൊച്ചാണ്, വളരെ ഡെഡിക്കേറ്റഡ് ആണ്. എല്ലാവരെയും സഹായിക്കും. അവൾക്കൊരു നല്ല ജീവിതം വേണം. നമുക്കുടനെ ഇവളെ കല്യാണം കഴിപ്പിക്കണം. ഇവളുടെ കല്യാണത്തിന് പത്തു പവൻ ഞാൻ തരും’. ഞാൻ വിചാരിച്ചു ചേട്ടൻ വെറുതെ പറഞ്ഞതാണെന്ന്,” സുബി പറഞ്ഞു.
എന്നാൽ, പിനീട് യാത്ര കഴിഞ്ഞു തിരിച്ചു എയർപോർട്ടിൽ എത്തിയപ്പോൾ അമ്മയെ നേരിട്ടു കണ്ടു ഇതേ കാര്യം അദ്ദേഹം പറഞ്ഞു എന്നും സുബി ഓർക്കുന്നു. ‘ഞാൻ പറഞ്ഞത് വെറുതെയല്ല മണിക്ക് ഒരു വാക്കേ ഉള്ളു, ആ പത്തു പവൻ ഞാൻ തരും’ കലാഭവൻ മണിയുടെ വാക്കുകൾ സുബി ആവർത്തിച്ചു. എന്നാൽ ആ പത്തു പവൻ തനിക്ക് തരാതെയാണ് അദ്ദേഹം പോയത് എന്ന് നിറകണ്ണുകളോടെ സുബി പറയുന്നു.
പ്രതികരിക്കാൻ ഇവിടെ എഴുതുക