സംസ്ഥാന സെക്രട്ടറിയേറ്റിന് നേരെ ബോംബ് ഭീഷണിയുമായി പോലീസ് ആസ്ഥാനത്തേക്ക് സന്ദേശം എത്തി. പോലീസിന്റെ എമർജൻസി നമ്പറായ 112 ലാണ് ഇന്ന് രാവിലെ പോലീസ് ആസ്ഥാനത്തേക്ക് ഭീഷണി സന്ദേശം എത്തിയത്.
ഭീഷണി സന്ദേശത്തെ തുടർന്ന് കന്റോൺമെന്റ് പോലീസ് ഉൾപ്പെടെയുള്ള സംഘം സെക്രട്ടറിയേറ്റിൽ പരിശോധന നടത്തിവരികയാണ്. ബോംബ്, ഡോഗ് സ്കോഡുകൾ പരിശോധന നടത്തുന്നതോടൊപ്പം സെക്രട്ടറിയേറ്റിലും പരിസരപ്രദേശങ്ങളിലും പോലീസ് പരിശോധന കർശനമാക്കുകയും സുരക്ഷ ഏർപ്പെടുത്തുകയും ചെയ്തിട്ടുണ്ട്.
ഭീഷണി സന്ദേശം എവിടെ നിന്ന് ലഭിച്ചു എന്നതിനെക്കുറിച്ച് പോലീസിന് ചില സൂചനകൾ ലഭിച്ചിട്ടുണ്ടെങ്കിലും ഇതിനെക്കുറിച്ചുള്ള വിവരങ്ങൾ പുറത്തുവിട്ടിട്ടില്ല. കേരളത്തിൽ നിന്നുള്ള നമ്പറിൽ നിന്നാണ് ഭീഷണി സന്ദേശം വന്നതെന്നാണ് പോലീസ് സൂചിപ്പിക്കുന്നത്.
നേരത്തെ മുഖ്യമന്ത്രിക്ക് നേരെയുണ്ടായ വധഭീഷണിയും കളമശ്ശേരി സ്ഫോടനവും അടക്കമുള്ള സംഭവങ്ങൾ എടുത്ത് സെക്രട്ടറിയേറ്റിലേക്കുള്ള ഭീഷണി സന്ദേശത്തെ അതീവ ഗൗരവത്തോടെയാണ് പോലീസ് കാണുന്നത്.
പ്രതികരിക്കാൻ ഇവിടെ എഴുതുക