തിരുവനന്തപുരം: 2012 മെയ് നാല് വെള്ളിയാഴ്ച രാത്രിയായിരുന്നു വടകര കൈനാട്ടിക്ക് സമീപം കാറിലെത്തിയ അക്രമി സംഘം ചന്ദ്രശേഖരനെ വെട്ടിക്കൊലപ്പെടുത്തിയത്. കൊലപാതകം നടന്ന് ഒമ്പത് വര്ഷം പിന്നിടുമ്പോള് ടി.പി വധത്തിന് പിന്നില് സി.പി.ഐ.എം പ്രവര്ത്തകരാണെന്ന് മന്ത്രി കെ.ടി ജലീല് പൊതുവേദിയില് പറയുന്ന ഒരു വീഡിയോ സാമൂഹ്യ മാധ്യമങ്ങളില് വൈറലാകുന്നുണ്ട്.
‘ TPചന്ദ്രശേഖരനെ വധിച്ചത് CPIMആണ്. അതിലൊരു സംശയമില്ല KTജലീല്..
സഖാക്കള് ഇതെല്ലാം കാണുന്നുണ്ടല്ലോ… അല്ലേ…. ‘ എന്നതരത്തിലാണ് പോസ്റ്റ് പ്രചരിക്കുന്നത്. കെ. ടി ജലീല് ടി.പി യെ കൊന്നത് ഏറ്റുപറയുന്നു എന്നാണ് വീഡിയോയില് സൂചിപ്പിച്ചിരിക്കുന്നത്.
എന്നാല് പ്രചരിക്കുന്ന വാദം തെറ്റാണെന്ന് ഇന്ത്യാ ടുഡേ ആന്റി ഫേക്ക് ന്യൂസ് വാര് റൂം (AFWA) കണ്ടെത്തി. 2012ല് കെ.ടി ജലീല് കോഴിക്കോട് നടത്തിയ ഒരു പ്രസംഗത്തിന്റെ ചില ഭാഗങ്ങള് മാത്രം എഡിറ്റ് ചെയ്താണ് ഇപ്പോഴുള്ള വീഡിയോ നിർമ്മിച്ചിരിക്കുന്നത്.
2012 ല് കോഴിക്കോട് അരീക്കാട് നടന്ന ഒരു പൊതുയോഗത്തിലാണ് അന്ന് എം.എല്.എ ആയിരുന്ന ജലീല് ടി.പി ചന്ദ്രശേഖരന് വധത്തെക്കുറിച്ച് സംസാരിച്ചത്. ഫേസ്ബുക്കിൽ നിന്നും വീഡിയോയുടെ പൂർണരൂപവും, യൂട്യൂബിൽ നിന്നും പ്രസംഗത്തിന്റെ മുഴുവൻ പതിപ്പും കണ്ടെത്താൻ സാധിച്ചു.
പ്രചരിക്കുന്ന വീഡിയോയ്ക്ക് വിപരീതമായി ‘ ടി.പി ചന്ദ്രശേഖരന് വധത്തിന് പിന്നില് സി.പി.ഐ.എം പ്രവര്ത്തകരാണെന്നത് നുണക്കഥയാണെന്നാണ് ജലീല് പ്രസംഗത്തില് പറയുന്നത്’. 2012ല് നെയ്യാറ്റിന്കരയില് നടന്ന ഉപതിരഞ്ഞെടുപ്പിന് ശേഷമാണ് ജലീല് ഈ പ്രസംഗം നടത്തിയതെന്ന് വ്യക്തമാണ്. പ്രസംഗത്തിന്റെ യഥാര്ത്ഥ പതിപ്പില് ജൂണ് 2ന് നടന്ന നെയ്യാറ്റിന്കര ഉപതിരഞ്ഞെടുപ്പ് ലക്ഷ്യമിട്ടാണ് യു.ഡി.എഫ്, ടി.പി ചന്ദ്രശേഖരനെ വധിച്ചതെന്നാണ് ജലീല് അര്ത്ഥമാക്കുന്നത്.
ടി.പി വധക്കേസില് സി.പി.ഐ.എം പ്രവര്ത്തകര് ഉള്പ്പെട്ടിട്ടില്ലെന്ന് ജലീല് പ്രസംഗിച്ചെങ്കിലും മൂന്ന് സി.പി.എം നേതാക്കളടക്കം കുറ്റക്കാരെന്ന് കണ്ടെത്തിയ 11 പ്രതികള് കോടതി ജീവപര്യന്തം ശിക്ഷ വിധിച്ചിരുന്നു. മറ്റൊരു പ്രതിയെ മൂന്ന് വര്ഷം കഠിനതടവിനും ശിക്ഷിച്ചു.
എന്നാല് ഇപ്പോള് പ്രചരിക്കുന്ന വീഡിയോയില് പറയുന്നതുപോലെ ടി.പി ചന്ദ്രശേഖരന് വധത്തിന് പിന്നില് സി.പി.ഐ.എം ആണെന്ന് മന്ത്രി കെ.ടി ജലീല് ഒരു വേദിയിലും പ്രസംഗിച്ചിട്ടില്ല. അദ്ദേഹം 2012ല് നടത്തിയ ഒരു പ്രസംഗത്തിലെ ചില ഭാഗങ്ങള് മാത്രം പ്രചരിപ്പിച്ചാണ് വൈറല് വീഡിയോ നിര്മ്മിച്ചിരിക്കുന്നതെന്ന് ഇതിലൂടെ വ്യക്തമാണ്.
https://www.facebook.com/100004160700012/videos/2006482242833780/
പ്രതികരിക്കാൻ ഇവിടെ എഴുതുക