മോസ്കോ: ടിവി പരിപാടിയ്ക്കിടെ നിര്ത്താതെ ചുമച്ച് ആശങ്ക സൃഷ്ടിച്ച റഷ്യൻ പ്രസിഡൻ്റ് വ്ലാഡിമിര് പുടിൻ ഒടുവിൽ വിശദീകരണവുമായി രംഗത്ത്. തനിക്ക് കൊവിഡ് ബാധിച്ചിട്ടില്ലെന്നും ഇത് ജലദോഷമാണെന്നും പുടിൻ വ്യക്തമാക്കി. ഉദ്യോഗസ്ഥരുമായിി നടത്തിയ ചര്ച്ച ടിവിയിൽ സംപ്രേഷണം ചെയ്തപ്പോള് പ്രസിഡൻ്റ് നിര്ത്താതെ ചുമയ്ക്കുന്നതു കണ്ടതാണ് ആശങ്ക സൃഷ്ടിച്ചത്.
തനിക്ക് ഒരു കുഴപ്പവുമില്ലെന്നും ആശങ്കപ്പെടേണ്ട കാര്യമില്ലെന്നും അദ്ദേഹം വീഡിയോ കോൺഫറൻസിനിടെ പറഞ്ഞു. “പേടിക്കേണ്ട, എനിക്ക് കുഴപ്പമൊന്നുമില്ല.” സെക്യൂരിറ്റി കൗൺസിലുമായി നടത്തിയ ചര്ച്ചയ്ക്കിടെ പുടിൻ പറഞ്ഞു. തനിക്ക് കൊവിഡ് 19 ബാധിച്ചിട്ടുണ്ടോ എന്നറിയാനായി പതിവായി പരിശോധനകള് നടത്തുന്നുണ്ടന്ന് പുടിൻ പറഞ്ഞു. കൊവിഡിനു പുറമെ മറ്റു അണുബാധകള് ഉണ്ടായിട്ടുണ്ടോ എന്നും പരിശോധിക്കുന്നുണ്ട്. എന്നാൽ ഇതുവരെ കുഴപ്പമൊന്നുമില്ലെന്ന് പുടിൻ വ്യക്തമാക്കി.
കാര്ഷികമേഖലയുമായി ബന്ധപ്പെട്ട കാര്യങ്ങള് ചര്ച്ച ചെയ്യാനായി പുടിൻ ഉദ്യോഗസ്ഥരുമായി നടത്തിയ ചര്ച്ചയ്ക്കിടെയായിരുന്നു ചുമ വില്ലനായത്. ചര്ച്ചയ്ക്കിടെ പലപ്പോഴായി അദ്ദേഹം ചുമയ്ക്കുന്നത് ടിവി സംപ്രേഷണത്തിനിടെയും കാണാമായിരുന്നു. കൊവിഡിന്റെ പ്രധാന ലക്ഷണങ്ങളിൽ ഒന്നാണ് ചുമ എന്നിരിക്കേ പുടിന്റെ ആരോഗ്യസ്ഥിതി എന്താണെന്നു സംശയിച്ച് നിരവധി പേര് രംഗത്തെത്തി. ഈ സാഹചര്യത്തിലാണ് തുടര്ന്നു നടന്ന ചര്ച്ചയ്ക്കിടെ റഷ്യൻ ഉപരിസഭയുടെ സ്പീക്കറായ വാലൻ്റീന മട്വിയെൻകോ ഇക്കാര്യം പ്രസിഡൻ്റിനോടു നോരിട്ടു ചോദിച്ചത്. എല്ലാവരും ആശങ്കയിലാണെന്നും വാലൻ്റീന പറഞ്ഞു.
ALSO READ:ഓര്ഡര് ചെയ്തത് 53,000 രൂപയുടെ ഫോൺ; കിട്ടിയത് സോപ്പ്
എന്നാൽ കുഴപ്പമൊന്നുമില്ലെന്നും തണുപ്പ് കൊണ്ടതുകൊണ്ടുള്ള പ്രശ്നമാണെന്നും റഷ്യൻ പ്രസിഡൻ്റ് മറുപടി നല്കി. “ഞാൻ പുറത്തിറങ്ങി തണുത്ത കാറ്റടിച്ചു കുറച്ചു നേരം നടന്നിരുന്നു. എന്നാൽ വലിയ പ്രശ്നമൊന്നും സംഭവിച്ചിട്ടില്ല.” പുടിൻ സുരക്ഷാ ഉദ്യോഗസ്ഥരോടു പറഞ്ഞു. “നിങ്ങള് വാക്സിൻ എടുത്തിട്ടുണ്ടെന്ന് എനിക്ക് അറിയാം. വീണ്ടും വാക്സിനെടുക്കാൻ ആരും മറക്കരുത്.” പുടിൻ പറഞ്ഞു. റഷ്യയിൽ കൊവിഡ് 19 ബൂസ്റ്റര് ഡോസുകള് വിതരണം ചെയ്യുന്ന സാഹചര്യത്തിലായിരുന്നു അദ്ദേഹം ഇക്കാര്യം പറഞ്ഞത്.
മുൻപ് പ്രസിഡൻ്റുമായി ബന്ധപ്പെട്ട് ജോലി ചെയ്യുന്ന നിരവധി ജീവനക്കാര്ക്ക് കഴിഞ്ഞ മാസം കൊവിഡ് സ്ഥിരീകരിച്ചിരുന്നു. ഈ സാഹചര്യത്തിൽ 69കാരനായ പുടിൻ ഏതാനും ദിവസം നിരീക്ഷണത്തിൽ കഴിയുകയും ചെയ്തിരുന്നു. എന്നാൽ ഇതിനു ശേഷം അദ്ദേഹം പതിവുപോലെ വീഡിയോകോൺഫറൻസിങ് വഴി പൊതുപരിപാടികളിൽ പങ്കെടുത്തു തുടങ്ങുകയും ചെയ്തിരുന്നു. അതേസമയം, രാജ്യത്ത് വീണ്ടും കൊവിഡ് 19 കേസുകള് വര്ധിക്കുന്നതിന്റെ ആശങ്കയിലാണ് റഷ്യ. വലിയ ഇടവേളയ്ക്ക് ശേഷമാണ് റഷ്യയിൽ വീണ്ടും കൊവിഡ് കേസുകള് കുതിച്ചുയരുന്നത്.
പ്രതികരിക്കാൻ ഇവിടെ എഴുതുക