വിനീത് ശ്രീനിവാസന് കേന്ദ്ര കഥാപാത്രമായി എത്തുന്ന പുതിയ ചിത്രമാണ് അരവിന്ദന്റെ അതിഥികള്. കഥ പറയുമ്പോൾ, മാണിക്യക്കല്ല് എന്നീ സൂപ്പര്ഹിറ്റ് ചിത്രങ്ങളൊരുക്കിയ എം.മോഹനന് ആണ് ഈ ചിത്രം സംവിധാനം ചെയ്തിരിക്കുന്നത്. വിനീതിനൊപ്പം ശ്രീനിവാസനും ഒരു പ്രധാന കഥാപാത്രമായി എത്തുന്ന ചിത്രമാണ് അരവിന്ദന്റെ അതിഥികള്. വിനീത് അരവിന്ദന് എന്ന ടൈറ്റില് റോളില് എത്തുമ്പോൾ മാധവന് എന്ന കഥാപാത്രത്തെയാണ് ശ്രീനിവാസന് അവതരിപ്പിക്കുന്നത്.
നിഖിലാ വിമലാണ് ചിത്രത്തില് വിനീതിന്റെ നായികയാവുന്നത്. മലയാളത്തില് അത്ര സജീവമല്ലെങ്കിലും നിരവധി തമിഴ് ചിത്രങ്ങളില് അഭിനയിച്ചിട്ടുളള താരമാണ് നിഖില. വരദ എന്ന കഥാപാത്രമായാണ് നിഖില ചിത്രത്തില് എത്തുന്നത്. ഒരിടവേളയ്ക്കു ശേഷം ഉര്വ്വശി ശ്രീനിവാസന്റെ കൂടെ അഭിനയിക്കുന്ന ചിത്രമാണ് അരവിന്ദന്റെ അതിഥികള്. ചിത്രത്തിലൊരു പ്രധാന കഥാപാത്രമായാണ് ഉര്വ്വശി ഈ ചിത്രത്തിൽ എത്തുന്നത്.
സലീം കുമാര്,അജു വര്ഗീസ്, ശാന്തി കൃഷ്ണ,ഷമ്മി തിലകന്, സ്നേഹ ശ്രീകുമാര് തുടങ്ങിയ താരങ്ങളും ചിത്രത്തില് അഭിനയിക്കുന്നുണ്ട്. വിനീതിന്റെ പതിവ് ചിത്രങ്ങള് പോലെ ഷാന് റഹ്മാന് തന്നെയാണ് ചിത്രത്തിനും സംഗീതം നല്കിയിരിക്കുന്നത്. ഷാന് റഹ്മാന് ഈണമിട്ട് വിനീത് പാടിയ കണ്ണേ തായ്മലരേ എന്ന ഗാനം നേരത്തെ സമൂഹമാധ്യമങ്ങളില് പുറത്തിറങ്ങിയിരുന്നു.
ചിത്രത്തിന്റെ ടീസറിനും പാട്ടുകള്ക്കും മികച്ച സ്വീകാര്യതയാണ് സമൂഹമാധ്യമങ്ങളില് ലഭിച്ചിരുന്നത്. അരവിന്ദന്റെ അതിഥികളില് വിനീത് പാടിയ പുതിയൊരു പാട്ടു കൂടി സമൂഹമാധ്യമങ്ങളില് പുറത്തിറങ്ങി. രാസാത്തി എന്നെ വിട്ട് പോകാതെടി എന്ന് തുടങ്ങുന്ന ഗാനമാണ് അണിയറപ്രവര്ത്തകര് പുറത്തുവിട്ടത്. ഗാനം കാണാം…
പ്രതികരിക്കാൻ ഇവിടെ എഴുതുക