കൊച്ചി: മാർച്ച് എട്ടിന് ആലുവയിലേക്ക് പ്രത്യേക ട്രെയിൻ സർവീസുകൾ. ശിവരാത്രി ദിനത്തിൽ ആലുവ ശിവക്ഷേത്രത്തിലേക്ക് എത്തുന്ന ഭക്തരുടെ തിരക്ക് പരിഗണിച്ചാണ് പ്രത്യേക സർവീസുകൾ ഒരുക്കിയിരിക്കുന്നത്.
ചില ട്രെയിനുകളുടെ സമയവും സ്റ്റോപ്പുകളും പുനക്രമീകരിച്ചിട്ടുണ്ട്. മുൻ വർഷങ്ങളിലേത് സമാനമായ ക്രമീകരണമാണ് ഇത്തവണയും ഒരുക്കിയിരിക്കുന്നത്.
മാർച്ച് എട്ട് വെള്ളിയാഴ്ച വൈകിട്ട് സർവീസ് നടത്തുന്ന നിലമ്പൂർ-കോട്ടയം എക്സ്പ്രസ് മുള്ളൂർക്കര, ഒല്ലൂർ, നെല്ലായി എന്നീ സ്റ്റോപ്പുകളിൽ നിർത്തുന്നതാണ്.
രാത്രി തൃശ്ശൂർ മുതൽ ഷൊർണൂർ വരെ സർവീസ് നടത്തുന്ന തൃശ്ശൂർ-ഷൊർണൂർ എക്സ്പ്രസ് സ്പെഷ്യൽ ട്രെയിൻ ആലുവ വരെ സർവീസ് നടത്തും.
രാത്രി 11:15-ന് പുറപ്പെടുന്ന ട്രെയിനുകൾ എല്ലാ സ്റ്റേഷനിലും നിർത്തിയ ശേഷം അർദ്ധരാത്രി 12:45 ഓടെ ആലുവയിൽ എത്തിച്ചേരും.
പിറ്റേദിവസം രാവിലെ 5:15-ന് ആലുവയിൽ നിന്നും പുറപ്പെടുന്ന തൃശ്ശൂർ-കണ്ണൂർ എക്സ്പ്രസ് രാവിലെ 6:40-ന് തൃശ്ശൂരിലെത്തി പതിവുപോലെ കണ്ണൂരിലേക്ക് യാത്ര തുടരും.
ഈ ട്രെയിൻ ആലുവയ്ക്കും ഷൊർണൂറിനും ഇടയിലുള്ള മുഴുവൻ സ്റ്റേഷനുകളിലും നിർത്തുന്നതാണ്.
അതേസമയം, ആറ്റുകാൽ പൊങ്കാലയോട് അനുബന്ധിച്ച് ഫെബ്രുവരി 25 ഞായറാഴ്ച മൂന്ന് സ്പെഷൽ ട്രെയിനുകൾ സർവീസ് നടത്തും. എറണാകുളത്തു നിന്നും നാഗർകോവിലിൽ നിന്നും മെമു സ്പെഷൽ ട്രെയിനുകളാണ് തിരുവനന്തപുരത്തേക്ക് സർവീസ് നടത്തുക.
തിരുവനന്തപുരം – കൊല്ലം , നാഗർകോവിൽ – തിരുവനന്തപുരം സെക്ഷനുകളിൽ വിവിധ ട്രെയിനുകൾക്ക് ഞായറാഴ്ച അധിക സ്റ്റോപ്പുകളും അനുവദിച്ചു.
എറണാകുളം – തിരുവനന്തപുരം സെൻട്രൽ സ്പെഷൽ മെമു ട്രെയിൻ ഞായറാഴ്ച പുലർച്ചെ 1.45ന് എറണാകുളത്ത് നിന്നു പുറപ്പെട്ട് രാവിലെ ആറരയോടെ തിരുവനന്തപുരം സെൻട്രലിൽ എത്തുന്ന രീതിയിലാണ് സർവീസ് ക്രമീകരിച്ചിരിക്കുന്നത്.
പിറവം റോഡ് 2.19, വൈക്കം റോഡ് 2.26, ഏറ്റുമാനൂർ 2.42, കോട്ടയം 02.55, ചങ്ങനാശേരി 3.03, തിരുവല്ല 3.13, ചെങ്ങന്നൂർ 3.24, മാവേലിക്കര 3.37, കായംകുളം 3.47, കരുനാഗപ്പള്ളി 4.03, കൊല്ലം 4.40, മയ്യനാട് 4.55, പരവൂർ 5.00, വർക്കല 5.11, കടയ്ക്കാവൂർ 5.22, ചിറയിൻകീഴ് 5:27, മുരുക്കുംപുഴ 5.35, കണിയാപുരം 5.39, കഴക്കൂട്ടം 5.45, കൊച്ചുവേളി 5.53, തിരുവനന്തപുരം പേട്ട 5.59 എന്നിവിടങ്ങളിലാണു ട്രെയിനിനു സ്റ്റോപ്പുകൾ.
സ്പെഷൽ മെമു ട്രെയിനിന്റെ മടക്കയാത്ര തിരുവനന്തപുരം സെൻട്രലിൽ നിന്ന് ഞായറാഴ്ച വൈകുന്നേരം മൂന്നരയ്ക്കായിരിക്കും. തുടർന്ന് രാത്രി 8.15ന് എറണാകുളത്ത് എത്തിച്ചേരും.
നാഗർകോവിലിൽ നിന്നും തിരുവനന്തപുരത്തേക്ക് 25നു സ്പെഷൽ മെമു സർവീസ് പ്രഖ്യാപിച്ചിട്ടുണ്ട്. പുലർച്ചെ 2.15നാണ് ട്രെയിൻ നാഗർകോവിലിൽ നിന്നും പുറപ്പെടുക.
നാഗർകോവിൽ 2.15, ഇരണിയൽ 2.34, കുഴിത്തുറ 2.50, പാറശാല 3.01, നെയ്യാറ്റിൻകര 3.12 സ്റ്റോപ്പുകൾ പിന്നിട്ടാണ് സ്പെഷൽ മെമു സർവീസ് 3:32ന് തിരുവനന്തപുരം സെൻട്രലിൽ എത്തുക.
സ്പെഷൽ ട്രെയിനുകൾക്ക് പുറമെ യാത്രക്കാരുടെ തിരക്ക് പരിഗണിച്ച് വിവിധ ട്രെയിനുകൾക്ക് ഞായറാഴ്ച അധിക സ്റ്റോപ്പുകളും പ്രഖ്യാപിച്ചിട്ടുണ്ട്.
മംഗളൂരു – തിരുവനന്തപുരം എക്സ്പ്രസിന് (16348) പരവൂർ, വർക്കല, കടയ്ക്കാവൂർ എന്നിവിടങ്ങളിലാണ് സ്റ്റോപ്പ് അനുവദിച്ചത്. പരവൂരിൽ പുലർച്ചെ 2:44നും വർക്കലയിൽ 2:55നും കടയ്ക്കാവൂരിൽ 3.06നുമാണ് ട്രെയിൻ എത്തുക.
ഗാന്ധിധം – നാഗർകോവിൽ എക്സ്പ്രസിനു (016355) പരവൂർ, കടയ്ക്കാവൂർ, ചിറയിൻകീഴ്, കഴക്കൂട്ടം എന്നിവിടങ്ങളിലും, അമൃത എക്സ്പ്രസിന് (16344) പരവൂരിലും ചിറയിൻകീഴിലും, 16603 മംഗളൂരു – തിരുവനന്തപുരം മാവേലി എക്സ്പ്രസിന് കടയ്ക്കാവൂർ, ചിറയിൻകീഴ് എന്നിവിടങ്ങളിലും, 12695 ഡോ.എംജിആർ ചെന്നൈ – തിരുവനന്തപുരം സൂപ്പർ ഫാസ്റ്റ് എക്സ്പ്രസിന് ചിറയിൻകീഴിലും അധിക സ്റ്റോപ്പുകൾ അനുവദിച്ചിട്ടുണ്ട്.
പ്രതികരിക്കാൻ ഇവിടെ എഴുതുക